viernes, 21 de junio de 2019

Ata sempre!


Non hai forma mellor para despedirnos que con eles e elas: Os Mini-Bibliotecarios, que marchan cara ao instituto. Só queremos que recordedes que o segredo é rodearse de persoas que vos fagan sorrir o corazón. É entón e so entón que estaredes no País das Marabillas.




Pero esta vez non só despedimos aos Minis, tamén nos despedimos nós... Durante sete anos esta biblioteca foi dinamizada e xestionada cun único obxectivo: que os nenos e nenas deste colexio gozasen da lectura, das historias e do coñecemento, tentando que sempre atopasen as actividades atractivas e divertidas. Por eles e con eles traballamos con ilusión e entusiasmo. 
Agora chega o momento de deixarlle o temón a outros compañeiros. Desexámoslles moita sorte na nova etapa e que gozen da experiencia coma o fixemos nós.

GRAZAS aos que durante todos estes anos formaron parte do equipo.
GRAZAS a tod@s os que nos apoiaron e nos axudaron a construír este proxecto.
GRAZAS a vós, pequenos e pequenas, por facer que a biblioteca fose un espazo vivo, creativo e versátil. 


FELIZ VERÁN A TOD@S. ATA SEMPRE!!

martes, 18 de junio de 2019

Makers PdB na biblioteca

Nestes dous anos temos probado novas ferramentas e novos enfoques didácticos que nos abriron as portas cara a unha biblioteca creativa e queremos rematar a nosa andaina compartindo con todos vos o traballo realizado e unha serie de consideracións sobre a filosofía maker e o aprendizaxe, co que toda biblioteca escolar está comprometida:
  • Porque temos claro que non importa tanto o produto final como todo o camiño percorrido.
  • Porque hai distintas maneiras de realizar a mesma actividade, estamos falando de pensamento computacional fronte a pensamento lineal, é dicir, ter maior liberdade creativa fronte a un traballo máis guiado.
  • Porque pódese graduar o nivel de dificultade adaptando a actividade aos intereses dos rapaces e non ao revés.
  • Porque este tipo de actividades intentan acortar a brecha entre rapaces e rapazas nas áreas tecnolóxicas.
  • Porque permiten que destaque todo tipo de alumnado xa que se valoran distintos tipos de intelixencias.
  • Porque é mellor amañalo ou facelo que comprar outro.
  • Porque é importante equivocarse, aprender do erro, xestionar a frustración…
  • Porque aprendemos xuntos e si, si se pode copiar.
  • Porque agora toca compartir...

viernes, 14 de junio de 2019

Ao sol, lese mellor

Deixamos atrás obrigas e horarios, materias e deberes, chuvia e escuridade... E ábrese ante nós un longo verán que nos preparamos para gozar. Queremos que deixedes todo atrás. Gozade do lecer, da praia, do mar, da natureza e sobre todo da familia e dos amigos.
E cando volo pida o corpo, lede todo o que poidades, enchede o verán de boas historias, estas que vos recomendamos ou outras que vos apetezan. Compartídeas con vosos amigos e amigas, contádellas aos avós, aos curmáns... para que eles tamén as gozen.

martes, 4 de junio de 2019

Malibú, o canciño mestre

A noticia correu como a pólvora polos corredores... Había un can na biblioteca! Esto desatou un mar de curiosidade e de entusiasmo. Pois si... era certo! Dende a Granxa Grande de Xanceda e organizado polo Equipo de Actividades Extraescolares, chegaron Malibú e Adriana para encontrarse cos nenos  e nenas de 2º e 5º de EP.


E como a nosa biblioteca está chea de historias, Adriana contounos a verdadeira historia do can Malibú. Foi un can abandonado que vagaba pola estrada preto da súa granxa. Recollérono, e tras darlle un bo baño, comida quente e moitos mimos, Malibú pasou de estar soíño no mundo a ser un máis. Os dous decidiron facerse mestres e a adicar os seus esforzos a compartir os seus momentos tristes para concienciar a pequenos e maiores da importancia da responsabilidade de ter unha mascota. Os animais non son xoguetes dos que un se cansa aos poucos días. As mascotas como Malibú, requiren unha serie de coidados e temos que facernos responsables delas: alimentación, coidados veterinarios, momentos de diversión, paseos, educación e mimos (moreas de mimos)
En definitiva, con Adriana e Malibú aprendemos que as mascotas son un membro máis da familia e sempre, sempre, hai que coidar moito delas.


lunes, 3 de junio de 2019

II Encontro robótico Arteixán

Xa van alá dous anos desde que arrincamos o proxecto de Bibliotecas Creativas na nosa biblioteca e, xa sabedes, que os espazos novos crean novas oportunidades. No noso caso, novas oportunidades de aprendizaxe. Pero o mellor que nos está traendo este proxecto son persoas que nos axudan a non derrapar nas curvas. Entre estas persoas están as compañeiras da EEI Barrionovo. E tocaba xuntarnos para ver, explorar, probar...



Foron tres días de visitas intensas. No seu Espazo Fedelleiro fixemos un taller de pintura y construcións con luz negra, xogamos na mesa de luz, pasamos polo taller de despezamento para aprender que hai dentro de obxectos electrónicos cotiáns e, como non, aprendemos a deseñar na app Doddle 3D para poder logo imprimir os nosos deseños. Tope de diversión. Todo, cos seus pequenos e pequenas de EI que foron os mellores anfitrións.



No noso Espazo Makers PdB, fixemos circuitos con plastilina condutiva e unha batería de experimentos que nos permitiu xogar coa auga, facer un arco da vella ou experimentar con forzas que fan que cambie a materia... A que soa moi científico? Así somos os makers. No nosos caso foron os pequenos makers de 2º os que se encargaron de todo.
Cantas ideas novas para o futuro levamos!!!

miércoles, 29 de mayo de 2019

Erica Esmorís e o poder de Amabel


Ter a Erica Esmorís na biblioteca é un pracer porque ela é unha persoa cunha especial sensibilidade con nenos e nenas por iso é tan fácil o seu encontro con eles. Sabe escoitalos e explicarlles a vida con palabras sinxelas. Erica falou de como una escritora enfróntase ao seu traballo. Do importante que é a disciplina porque iso da musas inspiradoras no funciona sen moito traballo detrás. Contounos como parte da súa experiencia para crear aos personaxes. A familia de Amabel está inspirada na súa propia familia aínda que eles non se recoñecesen!!



Tamén explicou que o resto dos personaxes son creación literarias que ela necesitaba para contar a historia ou como imaxinaba unha Amabel loura pero o ilustrador, despois de ler o libro, debuxou a Amabel morena e con gafas, como todos a coñecemos agora.
Para Erica este libro é un libro de longa vida, que lle segue dando moitas satisfaccións e segue sendo igual de actual que no momento no que se escribiu. Pode que o segreto do éxito estea en que a situación retratada é moi real: un pai que queda sen traballo coas consecuencias económicas que iso ten para a familia, unha nai que se mutiplica por mil para intentar chegar a todo... E polo medio, Amabel co seu poder que é un dos mellores do mundo pero non o imos a descubrir aquí.
Ao final resultou  que os nenos e nenas de 4º EP teñen superpoderes: parar todos os goles, ver o mundo de unha forma diferente aos demais, escoitar aos animais... Que poder ter ti?

martes, 28 de mayo de 2019

Visita das unitarias

Un ano máis recibimos aos nosos compañeiros das unitarias para que coñezan o seu novo cole do ano que vén. O alumnado de Infantil da clase dos Esquíos e dos Mouchiños representaron na aula de Contos dúas obras de teatro baseadas en dous contos moi coñecidos para eles. A primeira delas "Vou a Comedte" coa que algún dos cativos conseguiu sacar un pelo da boca que non lle deixaba falar ben e pronunciar ben a letra r  como lle pasa ao protagonista do conto. E a segunda representación foi "Orellas de Bolboreta" que trata dunha nena que coa súa imaxinación consegue darlle a volta aos crueis comentarios dos seus compañeiros e compañeiras do cole e ao final xogan con ela conseguindo vencer o seu medo para falar en público e a actuar fronte a descoñecidos.


viernes, 24 de mayo de 2019

Anxo Carracedo na Biblioteca


Este venres foi un día moi especial na nosa biblioteca porque visitounos Anxo Carracedo. Era unha visita que levabamos tentando desde hai tempo... pero mereceu a pena a espera e o esforzo.  
Con Anxo viaxamos polo mundo do ADN e da investigación xenética. Aprendimos as letras do noso ADN e falamos de como se combinan en cada ser vivo seguindo as liñas dun libro que, no caso dos seres humanos, sería tan grande como a Torre de Hércules. 
Como mellor apréndese é facendo, así que Anxo sintetizou o ADN dunha fresa con utensilios que todos temos na cociña: unha batedora, un colador, un pouco de agua, lavalouzas Fairy, alcohol e zume dun bote de piña (eses que están en todas as casas galegas, por se cadra). Foi un momento máxico cando o nobelo de ADN da fresa empezou a subir nunha copa de champaña.



Pero o mellor de todo foi a oportunidade de falar con él sobre as enfermidades raras, o TEA e o cancro e de como dende esta esquina do mundo, o seu equipo intenta sumar esforzos loitando contra elas. 
Nunca foi tan fácil acceder a todo como neste século que lles toca vivir aos nosos pequenos e pequenas e nunca houbo tanto ruído como hai agora, que non nos deixa encontrar as voces que merecen a pena ser escoitadas. Anxo é sen dúbida unha delas pola súa traxectoria profesional pero sobre todo pola súa visión do mundo e a súa calidade humana.


Moitas grazas profesor, por facernos un oco na súa apretada axenda para pasar un rato con nós.  

miércoles, 22 de mayo de 2019

Contacontos Kalandraka

Os nenos e nenas de 5 anos recibiron hai uns días unha carta sorpresa nas aulas que anunciaba a visita duns amigos de Kalandraka que querían compartir algúns contos e cancións con nós.


E por fin chegou o día no que apareceron na aula de Contos Sara e Alex, cargados cunha maleta chea de contos e instrumentos para sorprendernos coas súas rimas, cancións e alegría conseguindo que todos e todas estivésemos ben atentos ás súas historias dende o comezo ata o final.

jueves, 9 de mayo de 2019

Cantamos con Celtia?


Hai grandes contadoras de historias que desde que din a primeira palabra engaiolan aos pequenos e pequenas e desde logo, Celtia Figueiras é unha delas. A través do libro Cantamos? de Guindastre Edicións, escrito por ela e interpretado por  Luis Vallecillo, contounos tres pequenos relatos “O gato con botas, “Os tres porquiños” e “O parrulo feo". As súa voz e as súas mans déronlle vida aos monicreques que nos entusiamaron.
Rosi, a protagonista do conto, é unha nena a que lle gusta a música e axudounos a descubrir que os contos tamén se poden cantar. Acabamos aprendendo a canción e cantado e bailando todos xuntos.


Celtia conseguiu que fósemos os protagonistas da narración como só fan os grandes contadores e non houbo nada máis que a maxia das historias, da música  e as palabras. Totalmente entregados.
Moitas grazas, titiriteira!!!